Littera testimonialis costae sancti Odilonis confessoris abbatis Cluniacensis canonicis Carnotensibus concessae.

«Venerabilibus Patribus et dominis domnisque et amicis charissimis, dominis decano caeterisque canonicis Carnotens. Nos frater Aymo de sancto Geranno humilis prior prioratus Silvigniacensis, totusque ejusdem loci Deo devotus conventus, salutem in eo qui est omnium vera salus. Cum per reverendum in Christo Patrem ac dominum dominum R. permissione divina archiepiscopum Bituricensem, adjunctis secum nonnullis episcopis, abbatibus, clero ac populo pro majori parte totius patriae . . . . . ad dictum prioratum confluentibus, et ipsis praesentibus, secundo Idus mensis Aprilis, anno Domini millesimo trecentesimo quadragesimo quinto, corpus pii ac gloriosissimi Patris nostri beati Odilonis ad laudem totius curiae Paradisi, et ejusdem sancti solemnitatis cum illa devotione, honore et reverentia qua decuit relevavit. Qua relevatione completa, venerabili et discreto viro domino Stephano Rogerii concanonico vestro ac officiali Bituricensi nos humiliter cum magna instantia supplicante, quatenus de reliquiis sanctissimi corporis praedicti vobis mittere vellemus; cui supplicationi annuentes in quantum nobis Altissimus desuper ministravit, unam de costis praefati sancti Odilonis per ipsum vestro sanctissimo collegio duximus destinandam, quam in vestro capitulo cum magna reverentia et solemnitate recepistis; ordinare ac statuere proponentes, quod tam in vestra ecclesia cathedrali, quam in tota dioecesi faceretis ejus festum translationis ad exaltationem ejusdem sancti jugiter celebrari: dum tamen per nostras patentes litteras testificaremur dictam costam eduxisse de corpore ejusdem sancti, prout haec omnia in litteris vestris nobis destinatis vidimus plenius contineri. Devotioni vestrae, domini charissimi, cui in quantum possumus et debemus, super tam devota et solemni receptione dictarum reliquiarum regratiamur, significamus per praesentes dictam costam per praefatum dominum Stephanum Rogerii canonicum vestrum vobis traditam, de corpore beatissimi Odilonis extractam fuisse, et vobis per eum deferendam in praesentia plurium fide dignorum fuisse commendatam: quapropter vobis cum devota precum instantia supplicamus, quatenus festum translationis ipsius facere velitis in ecclesia vestra, et in tota dioecesi Carnotensi celebrari annuatim.
«In cujus rei testimonium sigilla nostra in his praesentibus litteris duximus apponenda. Datum in prioratu nostro praedicto, die vicesima secunda mensis Julii, anno Domini millesimo trecentesimo quadragesimo septimo.»