Signat magnificos tomus hic pro parte triumphos 
Magni Germani, genesim, miracula, mores; 
Qualiter a tenero pueritia floruit ungui, 
Auspiciis quanto sophiæ completa fluento; 
Fasces patricios, insignia nobilitatis, 
Clarum conjugii, rebusque et germine nomen, 
Posthabitum tandem constanti pectore mundum: 
Ordinis ut sacri metas, et pontificatus 
Sumpserit insignem meritis et nomine dotem: 
Indictasque cruces carni, jejunia longa, 
Noctes insomnes, et duri stramina lecti: 
Largaque quadrificum documenta aspersa per orbem: 
Clara et apostolicis miracula digna tropaeis: 
Egressum ad superos, et sacri jura sepulcri.