SANCTO ET A ME PONTIFICALI APICE PRAEFERENDO, DOMNO CERAUNIO PAPAE, WARNECARIUS Praecipuis beatissimorum episcoporum personis assidue coaequari meritis non desistis : in omni conversatione sacerdotii sancta quotidie exornare religionem festinans, divinarum scripturarum dogmata peragrasti ; nunc sanctorum martyrum gesta ad laudis tuae cumulum pro amore religionis congregare in urbe Parisiaca devotus intendis. Unde sancto Eusebio Caesariensi in aemulationis studio coaequandus es et pari gloriae dono perpetualiter memorandus. Da veniam nostrae imperitiae, quoniam te tantum laudare non sufficimus, quantum esses, cordi si facundia suecurrerit, praeferendus. Gesta sanctorum geminorum, qui in suburbio Lingonicae civitatis pretiosam adepti sunt consummationem martyrii, vel beatissimi Desiderii martyris et antistitis ipsius civitatis, sicut devotionis studio imperastis, ita desiderantissimę meae famulationis obedientia cognoscatis.